17. Jugenheimer Adventskalender-Türchen - Die Weihnachtsgeschicht noch'm Lukas

Die Weihnachtsgeschicht noch’m Lukas
(Autor: Thomas Klein)

Wie domols vor gut zwadausend Johr de Augustus Kaiser vum Reemische Reich gewese is, do hot er gemohnt, er hätt zu wenig Geld. Des mohne die do obbe aach heit noch. Guck der se oh in Berlin. Also hot der Augustus gesaat, mer misse dene Leit a bissje uff die Finger gucke, was se habbe, damit mer ordendlich Steiern kassiern kenne. Un genau wie aach bei uns vor ungefehr zwanzig Johr hot er e Volkszählung mache losse, wo all die Hos runner losse mussde, damit die do obbe genau gewisst hun, was die do unne hun, un was mer dene abknebbe kann. Bei dene domols wa´s abber so, dass jeder dort hot hiegehe misse, wo die Vorfahrn vum Vadder seiner Familie her warn. Die habbe halt noch nit so e Eiwohnermeldeamt mit Combuter gehaabt wie mir heitsedaach.

Un weil der Josip zwar jetzt in Nazareth in Galilea gewohnt hot, wo er en Schreinerbetrieb gehat hot, musst er nooch Bethlehem in Jüdäa laafe, weil dort nämlich seim Vadder sei Familie her war.
De Wesch war ganz schee weit. Des Nazaret, des leit dort, wo heit de Libanon is un Bethlehem leit in de Näh von Jerusalem. Ibber hunnert Kilomeder hot der laafe misse. Bei dene Wesche. Stroße wie heit hots noch koo gebbe, alles se Fuß gedibbeld. Die Maria hot wenigstens uff em Eselche sitze kenne. Abber bei der Streck und aach noch schwanger, des is koo Vergniesche. Des Bethlehem hot fer die Leit domols e besonners Bedeidung gehat. Vun dort war nehmlich der Könisch David her. Des war fer die Leit domols en ganz wischdische Mann. Der war domols zwar aach schunn dausend Johr dood. Abber der hatt des Juda un des Israel vereinischt un Jerusalem zu de Haubtstadt vun seim Land gemacht. Mer kennt den David heit aach noch, weil der der Bub war, der mit seine Schleider den Goliat besiescht hot.

Un weil der Josip zu dere Familie vum David hiegehert hot, hot er halt nooch Bethlehem gemisst. Die Maria is mit em. Die warn zwar erst velobt, aber se war schunn schwanger.
Anscheinend hot des e bissje gedauert, wie se in Bethlehem warn, bis des mit dere Intrachung in die Steierlist geklabbt hot. So is des heit noch uff dene Ämder. Guck der se doch oo uff de Gemoo. Weil des in Bethlehem so lang gedauert hot und die Maria jo schwanger war, is es langsam so weit gewese, dass des Kind kumme is.

Vorher war des bei dene Temperaturn do unne nit ganz so wischdisch, dass se in em Haus ibbernachte mussde. Abber jetzt fer die Geburt war e Herbersch needisch. Se habbe gesucht wie verrickt, abber koons hot ene e Stibbsche gebbe wolle. Also sinn se enaus uff die Wisse in en alde Stall, wo dann des Kind gebohrn worn is, was se in so e Fudderkribb ningeleht hun mit e bissje Stroh drunner.

Dort in dere Geeschend vun dem Stall warn aach e paar Schäfer, odder wie mer aach seet, Hirde, un hun die Nacht ibber uff ihr Schoof achtgebbe, damit dene nix bassiert un dass se nit geklaut wern. Un wie se so do drauße vor sich hie gedusselt hun, mied, un lieber im Bett geschloofe hädde, is uff ohmol en Engel zu ene kumme. Der is vum Herrn kumme un die ganz Herrlischkeit vum Herrn hot en umstrahlt. Des muss uunheimlich gewese sei, so dass die Kerle Ängst kriet hun. Abber der Engel hot glei zu dene gesaat, dass se koo Ängst se habbe brauche.

Un dann hot er gesaat, dass er dene e guud Neiischkeit bringe deed, ibber die sich die Leit vun ganz Israel freie deede. Heit, hot er gesaat, wär in ihrne Stadt, nämlich in Bethlehem, der Stadt Davids, ihrn Redder gebohrn worn. Christus wär des, de Herr! Se sollde selbst gugge gehe. Er deed in Winnele leie in ere Fudderkribb. Do droh deede se en erkenne kenne.

Un uff ohmol hun neber dem Engel en ganze Haufe annern Engel gestanne un hun Gott gepriese un hun gerufe: „All Ehr uff de Welt geheert Gott im Himmel!“ Sein Friede deed uff die Erd kumme zu de Leit, weil er se so gern habbe deed un liebe deed!

Wie dann die Engel widder in de Himmel abgemacht sin, hun die Hirde groß geguckt un hun gemohnt, dass se nooch Bethlehem mache sollde un gugge sollde, was basseert is un was Gott ihne verkinnischt hot.

Uffem Dobsch sin se ab bei de Stall un hun tatsächlich die Maria und de Josip un aach des Kind in de Fudderkribb gefunne. Naddeerlisch warn aach die Kuh und der Esel dodebei. Wie se so des Kind gesieh hun, hun se sofort verzeelt, was der Engel ihne vun dem Kind gesaat hatt. All, die dodebei warn, hun wahnsinnisch gestaunt, was die Hirde ihne verzeelt hun. Die Maria abber, die hot nix dodezu gesaat. Die hot alles ganz schee in ihrm Herzje bewahrt un immer widder dodribber nogedenkt. Jetz uff ohmol hots dene Hirde abber pressiert, weil se die Schoof schun die ganz Zeid hadde eloh gelosse. Also sin se widder serick bei die Schoof un hun Gott gepriese und hun em Dankeschee gesaat fer all des, was se hun heern kenne un was se gesiehe hadde. Un des war alles ganz genau so gewese, wie der Engel des ihne vorher verzeelt hatt.

(Abdruck der Geschichte mit freundlicher Genehmigung des Verlages aus: Das kleine rheinhessische Weihnachtsbuch/Leinpfad Verlag Ingelheim)